ஜோதிடம் - ஒரு அலசல்
ஒவ்வொரு மனிதனுக்குமே நாளை என்ன நடக்கும் என்பதைத் தெரிந்து கொள்வதில் தீராத ஆர்வம். அதுவும் வாழ்க்கையில் மோசமான கட்டத்தில் இருந்தால் சொல்லவே வேண்டாம். ஜாதகத்தைத் தூக்கிக் கொண்டு ஜோதிடர்களைத் தேட ஆரம்பித்துவிடுவார்கள். அவர் 'நாளை நன்றாக இருக்கும்; எதிர்காலம் பிரகாசமாக இருக்கிறது என்று சொன்னால் போதும்'. ஒரு மன நிம்மதி; உண்மையா என்றெல்லாம் தேவையில்லை. இன்றைக்கு ஒரு ஆறுதல்.. உண்மையிலேயே ஜோதிடம் சரியா? இல்லை ஏமாற்றுவேலையா? பார்ப்போம்.. முதலில் ஒரு கதை ( இல்லை, சரித்திரம்).
அவர் எழுதிய "பிருகத் ஜாதகம்" என்ற நூல் முழுக்க ஒவ்வொரு மனிதரின் எதிர்காலத்தை எப்படி கணிப்பது போன்ற அனைத்து ஜோதிடங்களையும் உள்ளடக்கியது. இன்றளவும் பின்பற்றப்படுகிறது.
வானியலில் சிறந்த இந்தியா
வராஹமிகிரர் உஜ்ஜையினியில் கணித ஆராய்ச்சி மையத்தைத் துவக்கியவர். முதலாம் ஆர்யபட்டரின் நூல்களை ஆராய்ந்து புதிய நூல்களை எழுதினார். அவையே நவீன வானியலுக்கு மூலமாக அமைந்தது.
வானியலில் பழங்காலத்திலிருந்தே இந்தியர்கள் சிறந்து விளங்கினார்கள். டெலஸ்கோப் போன்ற எந்த ஒரு உபகரணமும் இல்லாமல் சூரியன், புதன், செவ்வாய், சனி, வியாழன், சுக்கிரன், சந்திரன் (அறிவியல்படி துணைக்கோள்) ஆகிய கோள்களையும் அவற்றின் நகர்வையும் துல்லியமாக உலகிற்குக் கூறியவர்கள். அமாவாசை, பௌர்ணமி, கிரகணங்கள் அனைத்தையும் நாள், நேரம் வாரியாக இன்றைக்கும் துல்லியமாகக் கணிதத்தின் மூலம் முன் கூட்டியே சொல்கிறார்கள்.
சமீபத்தில் 3000 ஆண்டு வரையான சனி, குரு நகர்வைக் குறிக்கும் நூலைக் கண்டு வியந்து போனேன். இன்றைக்கு கம்ப்யூட்டர் துணையுடன் ஜோதிட மென்பொருட்கள் வந்துவிட்டன. அன்றைக்கு மனதில் கணக்கிட்டதை கம்ப்யூட்டர் நொடியில் சொல்லிவிடுகிறது. ஜோதிட மென்பொருட்கள் மூலம் யார் வேண்டுமானாலும் அமாவாசை, பௌர்ணமி, கிரகணங்கள் அனைத்தையும் கூறமுடியும். ஜோதிட கணிப்புகளையும் கூறமுடியும். ஆனால் ஜோதிட கணிப்புகளைக் கூற படிப்பும், திறமையும் வேண்டும், வராஹமிகிரரைப் போல.
ஜோதிடம் என்றால் என்ன?
'ஜியோடிஷ்' என்ற சமஸ்கிருத சொல்லில் இருந்து வந்தது. வானியலும் கணிதமும் இணைந்த கலை ஜோதிடம். வானில் கோள்களின் நகர்வுகள் பூமியிலும், அனைத்து உயிர்களிலும் தாக்கத்தை ஏற்படுத்துகின்றன என்கிறார்கள். (அறிவியல் இதை ஏற்றுக் கொள்வதில்லை. அதைப் பிறகு பார்ப்போம்).
குறிப்பிட்ட கோள்கள் எப்போது எந்த அமைப்பில் இருக்கும் என்பதை கணிக்கவும் எப்போது, எவ்வாறு வைதீக கர்மாக்கள் செய்ய வேண்டும் என்பதற்கு நெறிமுறைகள் உள்ளது. மிகத் தொலைவில் உள்ள நட்சத்திரங்கள் மற்றும் கோள்களின் நிலையைக் கணிக்க கணிதம் தெரிந்து வைத்திருப்பது கட்டாயமாகும்.
கணித அடிப்படையில் ஜோதிடம் மூன்று ஸ்கந்தங்களாக பகுக்கப்பட்டுள்ளது. சித்தாந்த ஸ்கந்தம், சம்ஹித ஸ்கந்தம். ஹோர ஸ்கந்தம். இவற்றில் சித்தாந்த ஸ்கந்தம் அல்ஜீப்ரா, ட்ரிகோணமெட்ரி, ஜியோமெட்ரி, கூட்டல் கழித்தல் போன்றவற்றின் அடிப்படையில் கணிக்கிறது. சம்ஹித ஸ்கந்தம், வானவியல் மற்றும் ஜோதிடம் முதலான துறைகளைப் பேசுகிறது. ஹோர ஸ்கந்தம் கோள்களின் இயக்கம் பூமியின் மீதும் அதன் மக்களின் மீதும் ஏற்படுத்தும் தாக்கத்தை விவரிக்கிறது.
ஜோதிடம் எப்படிக் கணிக்கிறார்கள்?
குழந்தை பிறக்கும் நேரத்தினை கொண்டு அந்நேரத்தில் நவகிரகங்களின் நிலையை கணக்கிட்டு எழுதுவது ஜாதகம் எனப்படுகிறது. நவகிரகங்களின் நிலையைக் கொண்டு குழந்தையின் ராசியும், நட்சத்திரமும், இலக்கினமும் குறிக்கப் பெறுகின்றன. ஜாதகத்தில் 12 கட்டங்கள் இருக்கும். . ஒவ்வொரு வீட்டையும் (கட்டம்) ராசி என்கின்றனர். அவையே மேஷம் முதல் மீனம் வரையிலான 12 ராசிகள். எனவே அதை ராசிச்சக்கரம் என்கின்றனர்.
சூரியன் மாதம் ஒரு வீட்டில் (கட்டத்தில்) இருந்து, 1 வருடத்தில் ஒரு சுற்று வரும். சந்திரன் ஒரு மாதத்தில் ஒரு சுற்று வரும். இது போல் அனைத்து கிரகங்களின் நிலையையும் இந்தச் சக்கரத்தில் குறிப்பிடுவார்கள்.
ராசியின் உட்பிரிவு நட்சத்திரங்கள். அசுவனி முதல் ரேவதி வரை 27 நட்சத்திரங்கள். குழந்தை பிறந்த நேரத்தையும், இடத்தையும் கொண்டு இலக்கினம் கணிக்கப்படுகிறது. அது இருக்கும் வீட்டின் பெயரால் (மேஷம் முதல் மீனம் வரை) அழைக்கப்படுகிறது. எந்தக் காலகட்டத்தில் எந்தக் கிரகத்தின் தாக்கம் அந்த ஜாதகதாரரின் மேல் இருக்கும் என்பதை 'தசாபுத்தி' என்கின்றனர். அது இலக்கினத்தைக் கொண்டு கணிக்கப்படுகிறது.
ஜாதகத்தில் குழந்தை பிறந்த நேரத்தில் சூரியன், புதன், செவ்வாய், சனி, வியாழன், சுக்கிரன், சந்திரன் ஆகிய கிரகங்களும், ராகு, கேது என்ற நிழல் கிரகங்களுடன் 9 கிரகங்களின் நிலை குறிப்பிடப்பட்டிருக்கும்.
இந்துக் காலக் கணிப்புமுறையால் உருவான பஞ்சாங்கம் என்ற கால அட்டவணைக் கொண்டு ஜாதகத்தின் பலன்கள் கணிக்கப்பெறுகின்றன. பஞ்சாங்கம் வாரம் (கிழமை), திதி, கரணம், நட்சத்திரம், யோகம் என ஐந்து உறுப்புகளைக் கொண்டதாகும். பஞ்சாங்கம் ஒவ்வொரு நாளின், நிமிடத்தின், விநாடியில், கிரகங்களின் நிலையைக் குறிக்கிறது. அன்றன்று ராசிச் சக்கரத்தில் கிரக நிலைகளை குறிப்பிடுவது கோச்சாரம் என அழைக்கப்படுகிறது.
ஜோதிடமும் அறிவியலும்
அறிவியல்படி, யுரேனஸ், நெப்டியூன் கிரகங்கள் ஜோதிடத்தில் குறிப்பிடப்படவில்லை. யுரேனஸ், சூரியனைச் சுற்ற 84 ஆண்டுகளும், நெப்டியூன் 160 ஆண்டுகளும் எடுத்துக் கொள்கின்றன. அவ்வளவு தொலைவில் இருப்பதால் ந்ம்மை பாதிக்கும் சக்தி இல்லை என்று கணக்கிடப்பட்டிருக்கலாம்.
ராகு, கேது என்ற கற்பனைக் கோள்கள் எதற்கு? சூரிய, சந்திர கிரகணங்கள் பூமியில் பாதிப்பை ஏற்படுத்துகின்றன அல்லவா? அதே போல மனித வாழ்வில் ஏற்படும் இன்னல்களைக் குறிப்பிட இந்த கற்பனைக் கோள்கள் உருவாக்கப்பட்டிருக்கலாம். அவை இல்லாது கிரகணங்களையும் கணிக்க முடியாது. வாழ்வின் இன்னல்களையும் கணிக்க முடியாது.
அறிவியல்படி, ஒரு விதி நிறுவப்பட்டால் அது எப்போதும் அப்படித்தான் செயல்பட வேண்டும். மாறி நடந்தால், அந்த விதி ஏற்கப்படாது. இது அறிவில்லாத இயந்திரங்களுக்கு சரியாக இருக்கும். அலைபாயும் மனித மனத்துக்கும், மாறிவரும் கால நிலைகளுக்கும் எப்படி ஏற்புடையதாக இருக்கும். ஜோதிடத்தில் எல்லா விதிகளுக்கும் விதிவிலக்குகள் உண்டு. உலகின் 790 கோடி மக்களுக்கும் மனங்களும் , குணநலன்களும், வாழ்விடங்களும், வாழ்க்கைமுறையும் வேறு வேறு அல்லவா? அத்தனையையும் கணிக்க யாரால் முடியும்?
ஜோதிட நூல்கள் மற்றும் நவீன ஜோதிடத்தின் மூலம்
ஜோதிடம், வேதத்தின் ஐந்தாம் வேதாங்கமாக கருதப்படுகிறது. இது வேதங்களின் கண்களாக கருதப்படுகிறது. இந்திய வானியல் மரபின் தொன்மையான பாடநூல் எனச் சிறப்பிக்கப்படுகின்றது. "இலகத மகரிஷி"யினால் இது இயற்றப்பட்டது என்பர். கி.மு 1200 - 1000 வரையான காலத்தைச் சேர்ந்த நூலாகக் கொள்ளப்படுகின்றது.
மேலே கூறிய வராஹமிகிரரின் ' பிருகத் ஜாதகம் ' முக்கிய நூலாகக் கருதப்படுகிறது. 28 அத்தியாயங்களைக் கொண்ட இந்த நூல் எப்படி மனிதர்களின் குணங்களையும், எதிர்காலத்தையும் கணிப்பது என்பதை விரிவாக விளக்குகிறது.
இந்து சமயத்தின் இதிகாசமான மகாபாரதத்தில் பஞ்சபாண்டவர்களில் ஒருவரான சகாதேவன் காலக்கணிப்பு முறையில் சிறந்தவர். இவரது ஜோதிட வழிகாட்டலும் சுவடிகளில் உள்ளது என்கின்றனர்.
சித்த வைத்தியத்தை உலகிற்கு தந்த அகத்திய மாமுனிவரும் ஜோதிட நூலும் எழுதியுள்ளதாகக் கூறப்படுகிறது. நிறைய புத்தகங்கள் கவிதைகளாக இவர்கள் பெயரில் உலாவருகின்றன.
சரசோதி மாலை என்பது ஒரு சோதிட நூல். இதனை இயற்றியவர் இலங்கையில் வாழ்ந்த போசராசர். இவர் 14ஆம் நூற்றாண்டில் வாழ்ந்த ஓர் அந்தணர். இந்த நூலை இவர் சக ஆண்டு 1232 க்கு இணையான கி.பி. 1310-ல் தம்பை என்னும் ஊரில் வாழ்ந்த பராக்கிரமபாகு என்னும் அரசனின் அவையில் அரங்கேற்றினார் என்று ஒரு பாடல் குறிப்பிடுகிறது.
இந்த நூலில் 12 படலங்கள் உள்ளன. இதில் விவாக கால நியதி, அக்கினி, ஆதானம், நெல் விதைத்தல், மகுடன் புனைதற்குரிய திறந்த, யுத்த யாத்திரை, ஆயுர் யோகம், அபிசித்து முகூர்த்தம் போன்ற பல்வேறு விஷயங்கள் பதிவுசெய்யப்பட்டுள்ளன. இந்த நூலில் பராக்கிரமபாகு மன்னனைப் போற்றிய பல செய்யுள்களும் உள்ளன.
சந்தான தீபிகை என்னும் சோதிட நூலை இயற்றிய யாழ்ப்பாணத்து இராமலிங்கையர் என்னும் சோதிடர் இதனைப் பதிப்பித்து வெளியிட்டுள்ளார்.
தஞ்சை சரசுவதி மாகால் நூலகம் பழைய ஜோதிட ஒலைச்சுவடிகளை தொகுத்து 'சாதக நூல்' என்ற பெயரில் வெளியிட்டுள்ளது.
இது போல புலிப்பாணி ஜோதிடம், மச்சமுனி ஜோதிடம், சுகர்நாடி ஜோதிடம் போன்ற நூல்களும் உண்டு.
இப்போது ஆயிரக்கணக்கில் ஜோதிட புத்தகங்கள் வருகின்றன. அனைத்திற்கும் மூலம் மேலே கூறப்பட்ட நூல்களே. ஆனால் எவ்வளவு நம்பத் தகுந்தது என்பது கேள்விக்குறியே!
வாழ்க்கை கடினமானதாக இருந்தால், ஜோதிடரைப் போய்ப் பார்த்து எதுவும் ஆகப் போவதில்லை என்பதை உணரவேண்டும். எதுவானாலும் வாழ்ந்துதான் ஆக வேண்டும். நாம் செய்வதை, உழைப்பதை செய்து கொண்டே இருக்கவேண்டும்.
கருத்துகள்
கருத்துரையிடுக