சுய முன்னேற்றப் புத்தகங்கள் - ஒரு அலசல்

 கட்டிக்கொடுத்த சோறும் கற்றுக் கொடுத்த சொல்லும் எவ்வளவு நாள் வரும்?

இன்றைக்கு உலகம் முழுவதும் கதையல்லாத (Nonfiction) புத்தகங்களில் சுய

முன்னேற்றப் புத்தகங்கள்தான் அதிகம் விற்கின்றன. மக்களுக்கு வாழ்க்கையில் முன்னேற ஏதாவது உந்துசக்தி தேவைப்படுகிறது. அது கடவுளிடமோ, ஆன்மீகத்திலோ அல்லது புத்தகங்களில் மட்டுமே கிடைக்கிறது. புத்தகங்களிலும் ஜோதிடப் புத்தகங்களை நாடி, வருங்காலம் எப்படி உள்ளது என அறிய ஆசைப்படிவோர் ஒரு சாரார். இளைஞர்கள் பெரும்பாலும் சுய முன்னேற்றப் புத்தகங்களையே நாடுகின்றனர்.

அதுவும் புத்தக வாசிப்பு வெகுவாக குறைந்துவிட்ட கம்ப்யூட்டர் காலத்தில், இந்தப் புத்தகங்கள்தான் வாசிப்பு பழக்கத்தை கொண்டு வருகின்றன.

எனது ஆங்கில வாசிப்பு கல்லூரி காலத்தில் தொடங்கியது. அதுவும் நாவல்கள், ஜேம்ஸ் ஹாட்லி சேஸ் ல் தொடங்கி, ஹெரால்டு ராபின்ஸ், அலிஸ்டர் மெக்லின், ப்ரெட்ரிக் போர்சித், இர்விங் வாலஸ் என்று தொடர்ந்தது. தமிழில் சுஜாதா போல ஆங்கிலத்தில் பிடித்த எழுத்தாளர் ராபர்ட் லட்லம் தான். அப்போதெல்லாம் நண்பர்களில் அறிவுஜீவிகள் சுயமுன்னேற்றப் புத்தகங்களையே படிப்பதாக பந்தா விடுவார்கள். அவற்றில்

முக்கியமானவை இவை. எனக்கு இந்த புத்தகங்களைப் படிக்க ஆரம்பித்தாலே தூக்கம் வந்துவிடும். அதனால் இது மாதிரி புத்தகங்களைத் தவிர்க்க ஆரம்பித்தேன்

  
பிறகு சுஜாதா அபிமானி ஆன பின் பிடிக்காமலே போனது. அப்போதுதான் எம்.எஸ்.உதயமூர்த்தி புத்தகங்களும் பிரபலம். இருந்தாலும் என்னை அவ்வளவு கவரவில்லை. அந்த வயதில், எல்லாப் புத்தகங்களுமே அறிவுப் பெட்டகங்கள் என்றுதான் எண்ணினேன். பிறகுதான், இடதுசாரி புத்தகங்கள், ஆன்மீகப் புத்தகஙகள், அரசியல் புத்தகங்கள்,வரலாற்று புத்தகஙகள் எல்லாவற்றிலும் உண்மையும் உண்டு. பொய்களும் உண்டு (எழுதுபவருக்கு தெரிந்தோ, தெரியாமலோ) என்று உணர்ந்தேன். ஆனாலும் அவற்றின் நுணுக்கமான அரசியல், கருத்து திணிப்புகள், விற்பனை தந்திரங்கள் எல்லாம் பிற்காலத்தில்தான் தெரிந்து கொண்டேன். 

தன்னம்பிக்கை புத்தகங்களின் பலமே வார்த்தை ஜாலங்களும், அந்த நேரத்தில் அவை கொடுக்கும் கவர்ச்சிகரமான போதைதான். புத்தகம் கொஞ்சம் பிரபலமானால் போதும். மார்கெட்டிங் உத்திகள் ஆரம்பமாகி விடும். அதற்காக அவற்றில் கருத்துகளே இல்லை என்று கூறவில்லை.

எந்த ஒரு புத்தக வாசிப்பிலும் 3 நற்பயன்கள் உண்டு. சிந்தனை தூண்டல், வார்த்தைப் பிரயோகங்கள் கற்றல் (Vocabulary), ஏதாவது ஒரு கருத்தை கற்றல். எனவே எந்தப் புத்தகமானாலும் வாசிப்பதில் தவறில்லை.

பகுத்தறியும் திறனை வளர்த்துக் கொள்வதுதான் முக்கிய தேவை. இந்தியாவில் இந்த

சுயமுன்னேற்ற இலக்கியமே இல்லையா? நிறைய இருக்கிறது. நமது நூல்கள் வெறும் செல்வம் சேர்க்கும் வழிகள், தலைவனாக்கும் வழிகள் என்று பொருள் சார்ந்த வாழ்வை (Materialistic Life) ஆதரிப்பதில்லை. மனிதனை நல்வழிப்படுத்துதல், அதன்மூலம் அவனுக்கு மன அமைதியை உருவாக்குதல், அதனால் அவன் வாழ்வில் முன்னேற வழி செய்தல் என்கிற ரீதியில்தான் இருக்கும். சங்க நூல்கள், திருக்குறளிலிருந்து, ஆத்திசூடி, நாலடியார், மூதுரை போன்று ஆயிரக்கணக்கில் உள்ளன. அடுத்த தலைமுறைக்கு அவற்றை கொண்டு சேர்க்கும் கடமையும் நமக்கு உண்டு.

மேலைநாடுகள் முழுக்க இந்த பொருள் சார்ந்த வாழ்வையே நம்மிடம் திணிக்கின்றன. உடனடி செல்வந்தராவதற்கு வழி, இலட்சியங்களைக் கனவைத்

துரத்துவதுபோல் துரத்துவது என்பன எல்லாம் கவர்ச்சிகரமான எண்ணங்கள்தானே! நேர்மறை எண்ணங்களை (Positive Thinking) வளர்ப்பதற்கு எத்தனை புத்தகங்கள்? ஆனால் நமது வள்ளுவர்' உள்ளுவதெல்லாம் உயர்வுள்ளல்" என்று எளிமையாகச் சொல்கிறாரே! 'ஊக்கமுடைமை' அதிகாரம் முழுக்கவே தன்னம்பிக்கை ஊட்டுபவைதானே! விவேகானந்தரையும் படியுங்கள். மனம் எழுச்சி கொள்ளும்.

நான் படித்து உணர்ந்து கொண்டது எல்லாம் இதுதான் : வாழ்க்கை - உடல் ஆரோக்கியம், செல்வம், உறவுகள், நல்ல பழக்கவழக்கங்கள் ஆகிய நான்கு தூண்களால் ஆனது. இவை நான்கும் சமமாக உள்ளவர்கள் மகிழ்ச்சியாக உள்ளனர். அப்படி அமைத்துக் கொள்ள வேண்டும். சுயநலம், எதிர்மறை சிந்தனைகள், பயம் ஆகிய மூன்றும் கரையான்போல மகிழ்ச்சியை அரிக்கின்றன. எப்போதும் சுறுசுறுப்பாக செயல்பட்டுக் கொண்டே இருங்கள். Simple!

நிறைவு செய்யும் முன் உங்களுக்காக, தற்போது பிரபலமாக விற்பனையாகிக் கொண்டிருக்கும் சுய முன்னேற்றப் புத்தகங்கள்- 

நிறைய வாசியுங்கள். பணக்காரராவதற்கு அல்ல, அறிவை வளர்ப்பதற்கு.